3257; Kitakachokuondoa kwenye mchezo haraka zaidi.

Rafiki yangu mpendwa,
Haya maisha ni mchezo mmoja mkubwa sana, ambao ndani yake kuna michezo mingi midogo midogo.
Kazi ni mchezo ndani ya mchezo wa maisha. Kadhalika biashara, fedha, uwekezaji, mahusiano na mengine yote tunayofanya kwenye maisha.

Kwenye michezo, pale mtu anaposhindwa huwa kunakuwa na kasumba ya kulaumu upande shindani kutumia njia zisizo sahihi au kupendelewa ndiyo maana upande huo ukashinda.
Lakini hizo huwa ni kauli za kujifariji tu, ukweli ni kwamba upande unaoshinda unakuwa umejiandaa vyema kushinda wakati upande unaoshindwa unakuwa ulishashindwa kabla hata ya kuanza.

Kwenye mchezo wa maisha, kuna kosa moja ambalo limekuwa linapelekea wengi kushindwa kabla hata hawajakutana na ushindani wa nje.
Yaani wanaingia uwanjani wakati tayari wameshashindwa.
Na hilo ndiyo limekuwa chanzo cha wengi kushindwa kwenye maisha yao.

Kosa hilo ni kukosa umakini (fokasi) kwenye kile ambacho mtu anafanya. Hili ni kosa linaloanzia ndani ya mtu mwenyewe lakini lenye nguvu ya kumtoa mtu kwenye mchezo kabisa.

Kufokasi imekuwa ni kitu kigumu kwenye zama hizi kutokana na vitu vingi vinavyolenga kunasa umakini wetu.
Kwenye muda mchache unaokuwa nao, kunakuwa na mambo mengi ambayo unataka kuyafanya.
Hilo linapelekea kuutawanya muda wako kwenye mambo mengi ila yasiyokuwa na tija.
Matokeo yake ni mtu kushindwa kuzalisha matokeo makubwa kwenye kitu chochote kile.

Kufokasi imekuwa ni kitu kigumu kwa walio wengi, kwa sababu uelewa wa watu kuhusu kufokasi ni tofauti na uhalisia wa kufokasi.
Wengi wanachoelewa kuhusu kufokasi ni kupeleka umakini wa mtu kwenye mambo yaliyo muhimu na kuachana na yasiyokuwa muhimu.
Lakini ambapo wengi wanakuja kuanguka ni pale mambo mengi yanapokuwa yote ni muhimu.
Huwa wanasema kama kila kitu ni muhimu, basi hakuna kilicho muhimu.

Maana halisi ya kufokasi ni kusema HAPANA kwenye vitu ambavyo ni muhimu, ili kupeleka umakini wako wote kwenye kitu kimoja kilicho muhimu zaidi.
Kufokasi ni kusema HAPANA kwenye vitu vingi vizuri ili kupeleka umakini wako wote kwenye kitu kimoja bora.
Hapo ndipo ugumu wa kufokasi unapoanzia, kwa sababu wengi wanakuwa hawana ujasiri wa kusema HAPANA kwenye vitu ambavyo tayari vina manufaa fulani kwao.

Kufokasi ni kuwa tayari kupoteza kabla ya kupata. Sasa kwa sababu watu wengi wana mtazamo wa uhaba, huwa hawapo tayari kupoteza hata kidogo. Kukosa utayari wa kupoteza kunawapeleka kujikosesha kupata makubwa zaidi.

Ushindi wako kwenye eneo lolote la maisha yako unaanzia kwenye uwezo wako wa kufokasi.
Ni pale unapoweza kuweka umakini wako wote kwenye kitu kimoja na kukifanya kwa ukubwa kuliko kuutawanya kwenye vitu vingi na kupata matokeo ya kawaida.

Kufokasi siyo kitu ambacho unaweza kuamua kuwa nacho au kutokuwa nacho. Bali kufokasi ni aina ya maisha ambayo mtu unachagua kuyaishi.
Bila ya kugeuza kufokasi kuwa mfumo wako mzima wa maisha, utalaghaiwa na kujikuta umeshahama kwenye yale muhimu zaidi kwako na kwenda kwenye yasiyokuwa muhimu.

Changamoto kubwa sana kwenye kufokasi ni kwamba kila mtu anawinda umakini wako.
Na wengi wa hao ambao wanafanya hivyo, wanazo mbinu za kukushawishi unase kwenye mitego yao.
Bila ya kuwa katili kwenye kusema HAPANA kwa yote yasiyokuwa muhimu kwako, hutaweza kufanya makubwa.
Ni lazima uwe tayari kusema HAPANA kwa yote yasiyokuwa muhimu kwako, hata kama kufanya hivyo kunawaumiza wengine.

Kama unajaribu kuyaishi maisha yako ili kumfurahisha kila mtu, utaishia kushindwa vibaya sana. Kwani hutawaridhisha watu wote hata ufanye nini. Lakini zaidi, utajiumiza zaidi wewe mwenyewe pale unapojaribu kuwaridhisha wengine.
Fokasi kwa kupeleka umakini wako wote kwenye kitu kimoja kilicho muhimu zaidi kwako na kusema HAPANA kwa vitu vingine vyote, hata kama vinaonekana ni muhimu.

#NidhamuUadilifuKujituma
#AfyaUtajiriHekima
#KaziUpendoHuduma
#UpekeeUdadisiUbunifu
#UshirikianoUtegemeanoUwajibikaji
#BilioneaMafunzoni
#NajengaBiashara
#HakunaKingineMuhimu
#LazimaNitoboe
#NawekaKaziNifanikiwe