Habari za asubuhi ya leo rafiki yangu?
Ni siku nyingine nzuri sana ya leo ambapo tumepata nafasi nzuri na ya kipekee kwetu kwenda kuweka juhudi kubwa ili kuweza kupata matokeo bora zaidi.
Msingi wetu wa mafanikio ni NIDHAMU, UADILIFU na KUJITUMA ambao unatuwezesha kupata matokeo bora leo na kila siku ya maisha yetu.
Asubuhi ya leo tutafakari kuhusu NI KUFANYA….
Unaweza kutumia muda wa kutosha kujifunza kuhusu kuendesha baiskeli, unaweza kusoma vitabu na unaweza kuangalia video, unaweza kuwaangalia wengine wanaoendesha.
Lakini utakapoanza kuendesha, lazima utayumbayumba na hata kuanguka.
Licha ya kujua kila unachopaswa kujua, bado mwanzo wa kufanya hautakuwa rahisi.
Hata ujue kitu kiasi gani kwa nadharia, kinachokamilisha ujuzi wako NI KUFANYA.
Unapofanya unajifunza mengine mengi ambayo huwezi kujifunza nje ya kufanya.
Unapofanya unajijengea kujiamini kwamba unaweza kufanya.
Unapofanya unajijengea uzoefu wa kwamba unaweza kufanya.
Hivyo rafiki, chochote unachojifunza na kukipenda, kifanye. Utajifunza mengi sana kwenye kufanya kuliko kuishia kujifunza pekee.
Iwe ni njia mpya ya kufanya mambo, iweke kwenye vitendo.
Na kama huna uhakika wa matokeo unayopata, anza kidogo kwa lengo la kujifunza.
Mwanzo wa jambo lolote ni mgumu na hauna uhakika, kufanya ndiyo kunaondoa ugumu na kutupa uhakika, lakini baada ya kushindwa na kuanguka kidogo.
Kipi ambacho umekuwa unataka kufanya siku nyingi lakini hufanyi? Hebu anza kukifanya leo kwa hatua za chini.
Nakutakia siku njema sana ya leo, uende ukafanye makubwa na kuweza kupata matokeo bora.
Rafiki yako,
Kocha Makirita Amani,
MAFANIKIO NI HAKI YAKO YA KUZALIWA.
AMKA MTANZANIA 