2495; Unajua cha kufanya.

2495; Unajua cha kufanya.

Wakati naanza huduma ya ushauri na ukocha, nilidhani watu hawafanikiwi kwa sababu hawajui cha kufanya.
Hivyo nilikuwa na haraka sana ya kuwaambia nini wanapaswa kufanya, hasa wanapokuwa kwenye changamoto mbalimbali.

Lakini kadiri ambavyo nimeendelea kufanya huduma hii, nimegundua kitu kimoja kikubwa sana.
Watu hawafanikiwi siyo kwa sababu hawajui cha kufanya, ila kwa sababu hawana ujasiri wa kutosha kufanya kile wanachojua wanapaswa kufanya.

Kila mtu mwenye akili timamu anajua kabisa nini anapaswa kufanya kwenye kila hali anayokuwa anapitia.
Hata kama anapitia magumu kiasi gani, anajua kabisa nini cha kufanya.
Lakini wengi hawafanyi, kwa sababu ya kukoja ujasiri na hata wakati mwingine upendo wa kufanya.

Nafsi zetu za ndani zinajua kila kitu kuhusu sisi na zimekuwa zinatuambia wazi kabisa nini cha kufanya kwenye kila hali tunayopitia.
Tatizo linakuja kuanzia kwenye akili zetu, tunaanza kuchambua kile tunachojua tunapaswa kufanya, tunayaangalia magumu, tunakaribisha hofu, inatutisha kwamba tutashindwa na hapo tunashindwa kufanya.

Kama ukiisikiliza nafsi yako na ukajijengea ujasiri na upendo wa kufanya kile ambacho unajua unapaswa kufanya, utafanya mengi na utapiga hatua kubwa.
Haimaanishi kwamba hutakosea, utakosea sana, lakini kwa kukosea utajua yaliyo sahihi zaidi kufanya.

Kila unapojikuta njia panda, pumzisha akili yako kwa muda na isikilize nafsi yako, kisha fanya kile ambacho nafsi yako inakuambia.
Weka kila ulichonacho kwenye kitu hicho na boresha kadiri unavyokwenda.

Hatua za kuchukua;
Kwa njia panda uliyopo sasa au changamoto unayopitia sasa, acha kuifanyia tathmini zaidi ya ambavyo umeshafanya, kaa mahali tulivu, fumba macho yako, pumua kwa kina kwa dakika tano, weka mkono wako wa kulia kwenye moyo wako kisha jiulize nini unapaswa kufanya.
Jibu utakalofanya ndiyo kitu cha kufanya, anza mara moja kufanya hicho. Ukikutana na magumu yatatue na endelea kufanya.

Tafakari;
Hakuna asiyejua cha kufanya, tatizo tunaruhusu fikra zetu kupuuza nafsi zetu na hilo ndiyo linatuweka kwenye migogoro.

Kocha.