Haya Ndiyo Maswali Matano Kwa Mtaalamu Wako Kabla Hujaanza Ujenzi Wa Nyumba Yako.

Ni ukweli usio na shaka kuwa kila mtu anahitaji kuwa na nyumba bora, safi na salama kwa matumizi mbalimbali ikiwemo makazi na biashara. Pamoja na utofauti wetu wa kipato lakini bado ni watanzania wachache sana wamepata hamasa ya kuwa na nyumba bora za kisasa zitakazo wafanya kufurahia juhudi zao katika kuifanya furaha kuwa sehemu ya maisha. Juhudi kubwa zinapaswa kufanyika katika kutoa elimu na ushawishi kuhusu umuhimu wa kuwa na makazi bora na salama kwa kila mtu. Mazingira safi na salama ni matokeo chanya ya kuwa na makazi bora na salama, thamani ya maisha yako ni nyumba, fahari ya nyumba ni upekee wake katika kuifanya dunia kuwa sehemu bora na salama kwa maisha yako. Mwonekano bora wa mji ni matokeo ya ubunifu na usanifu wa fikra za zama za leo. Ubunifu wa aina tofauti wa nyumba zinazoendelea kujengwa sehemu mbalimbali zimekuwa kivutio kikubwa kwa watu mbalimbali ndani ya jamii na kuchangia kwa kasi ukuaji wa miji na vijiji hapa nchini. Hayo yote ni matokeo chanya ya kuwa na wataalamu bora na wenye weledi katika fani ya ubunifu, usanifu na usimamizi wa majenzi.

ujenzi 35

Pamoja na mabadiliko yanayoendelea kutokea bado kuna baadhi ya watu hawajafahamu vizuri hatua mbalimbali katika kuwafikia wataalamu watakao wasaidia kutimiza malengo ya kumiliki nyumba bora za kisasa. Hata kama watawafikia bado hujikuta kwenye wakati mgumu wa kushiriki kutokana na kutojua umuhimu na wajibu wao wa kushiriki hasa kwenye hatua ya ubunifu na usanifu wa nyumba. Leo nimekuletea mambo matano ambayo unapaswa kuuliza, kushauriwa na kuelewa vizuri pale utakapo kutana na mtaalamu wako wa ujenzi.

Mwonekano Bora Wa Nyumba Yako

Wataalamu wa ujenzi ni watu wanaozingatia sana mwonekano bora wa nyumba wakati wa ubunifu na wakati wa ujenzi. Kazi yake ya ubunifu humtambulisha uwezo na umahiri wake kwenye jamii husika, hili ndiyo jambo la kwanza ambalo unapaswa kuwa na utambuzi kwenye ufahamu wako. Wasilisha vizuri mapendekezo yako ya aina gani ya nyumba unayoitaka ambayo wewe unaamini kuwa utaipenda na itakufaa kwa matumizi yako uliyokusudia. Vyovyote utakavyo mueleze na kuuliza kuhusu mwonekano wa namna nyumba yako itakavyoonekana, mtaalamu wako ana uwezo mkubwa wa kufanya chochote kwa kuzingatia mambo mbalimbali ya kitaaluma, yapo mambo mengi yanayo muongoza katika utendaji wa kazi yake, ushiriki wako ni muhimu sana kwa kuwa kuna baadhi ya mambo yanahitaji ushiriki wa karibu sana wa kimajadiliano katika uboreshaji wa ramani za nyumba wakati wa ubunifu. Yapo utakayo yapenda wewe lakini kwa wengine ni chukizo, ni kawaida sana hayo kutokea lakini ni muhimu sana kusikiliza maoni ya wengine yatakayo kusaidia kuboresha baadhi ya mapungufu ambayo hukuyaona, mwisho mtaalamu wako ndiye atakayekusaidia kuboresha mwonekano bora wa nyumba yako.

SOMA; Hizi Ndiyo Faida Tano Pekee Za Kutumia Wataalamu Kwenye Ujenzi Wa Nyumba Yako.

Gharama Halisi Za Ujenzi

Ujenzi wa nyumba sio jambo la kulifanyia mzaha kabisa, itakugharimu sana na kufanya kitu ambacho hukutarajia. Mfumo na mpangilio wa ramani ya nyumba yako ndiyo utakao amua gharama halisi ya ujenzi kwenye eneo husika. Ni muhimu sana ukafahamu uwezo wako wa kifedha kwa ajili ya ukamilishaji wa ujenzi wako, epuka msongo wa mawazo kwa kuwa na ramani nzuri ya kisasa inayoendana na uwezo wako wa kifedha. Weka wazi uwezo wako wa kifedha kwa mtaalamu wako na atakushauri na kukupa ramani bora na nzuri itakayo lingana sawasawa na gharama utakazo zimudu pasipo na hofu yoyote ya kushindwa. Kushindwa kupata ufafanuzi kuhusu makadirio ya gharama za ujenzi kutakuweka kwenye wakati mgumu sana wakati wa ujenzi, jitahidi sana kuwa na taswira ya uwezo wako wa kifedha na usisite kumuuliza mtaalamu wako namna mbalimbali za kupunguza gharama pasipo kuathiri malengo yako ya kuwa na nyumba uipendayo. Usiogope kuanza sasa, hata wewe unaweza kumiliki nyumba nzuri inayoendana na kipato chako na ikawa kivutio kwenye macho ya watu.

Upatikanaji Wa Mjenzi Bora

Watu wengi wamejikuta wakiingia kwenye matatizo ya kiutendaji wakati wa ujenzi pasipo kutarajia, changamoto hizi huwaweka katika wakati mgumu wa kifikra na kimaamuzi, hivyo ni muhimu sana kuwa na mtaalamu wa ujenzi atakaye kupatia ushauri na mbinu za kukabiliana na hatari zozote zitakazojitokeza kwenye ujenzi wako. Kwa sasa unaweza kupata mjenzi bora kupitia vyanzo mbalimbali vya taarifa ikiwemo tovuti zinazohusu ujenzi na taasisi zake, ndugu, jamaa, familia na  marafiki, pia kwa sasa wapo watu binafsi na kampuni za ujenzi ambazo zinatoa huduma maeneo yote na wakati wowote, kinacho hitajika ni wewe kuwa tayari. Usisite kuuliza kuhusu mbinu za utekelezaji wa ujenzi, hatua utakazopitia na aina ya wajenzi watakao endana na ramani ya nyumba yako ikiwemo uwezo wako kifedha. Epuka hasara na kadhia kwa kuwa na mjenzi bora, mwaminifu na mzoefu wa hicho anachokifanya.

Upatikanaji Wa Malighafi

Mabadiliko ya zama za leo kwenye sekta ya ujenzi kwa kiasi kikubwa yanaendeshwa na mfumo wa masoko huria. Hali hii ina matokeo ya pande mbili, faida na hasara kwa watumiaji wa mwisho wa bidhaa husika. Ni muhimu sana kuzingatia ubunifu na umahiri wa mwenendo wa soko la malighafi na vifaa vya ujenzi kabla hujachukua hatua ya kununua. Mfumo huu wa soko huria ndani yake kuna udanganyifu sana, umakini wako ndiyo utakao kuepusha na hasara hizo. Usisite kuuliza na kupata ushauri kuhusu upatikanaji wa malighafi nzuri mtakazo pendekeza kutumika wakati wa ujenzi, usikurupuke kwa unafuu wa gharama za bidhaa, utajutia kesho yake. Ubunifu wa ramani ya nyumba yako ndiyo itakayo toa dira ya maamuzi ya aina za malighafi na ubora katika kufikia uhalisia wa mwonekano wa nyumba iliyokusudiwa. Epuka hasara ya matengenezo ya mara kwa mara inayotokana na malighafi hafifu kwa kuamua kutumia wataalamu kabla na wakati wa ujenzi.

SOMA; Mambo Muhimu Ya Kuzingatia Ili Kuepuka Nyufa Kwenye Nyumba Yako Pale Unapokutana Na Udongo Wa Mfinyanzi.

Uwezekano Wa Matengenezo

Ujenzi wa nyumba za kisasa unajumuisha mpangilio wenye mifumo mbalimbali inayotumia teknolojia za kisasa, ni muhimu sana ukafahamu vizuri utendaji na namna ambavyo itakavyotoa fursa ya kufanyiwa matengenezo pasipo kuwa na gharama kubwa au kuathiri muhimili wa nyumba endapo litatokea tatizo lolote la kimfumo. Mifumo ya maji safi na maji taka, umeme, moto, ulinzi, muziki, sauti, mapambo, intaneti na mawasiliano ni mambo ambayo huleta shida sana kwenye nyumba za kisasa. Ni muhimu sana kuuliza na kufahamu ili uwe makini kwenye matumizi na kuepuka mwingiliano wa shughuli hatarishi kwenye hiyo mifumo. Pia ni muhimu mifumo yote ya nyumba ikarahisisha uwezekano wa kufanyiwa marekebisho wakati wowote pasipo kuathiri mwonekano wa nyumba, kusababisha gharama kuwa kubwa au ubomoaji usio na ulazima. Mabadiliko ya sasa yanatulazimisha kuwa na nyumba bora na za kisasa ambazo ubora wake ni matokeo ya kutumia wataalamu wa fani husika kwenye kila hatua ya ujenzi.

Tafakari yako kuhusu Makala hizi ni muhimu sana…..!!!! maoni na maswali yako ni mambo ambayo nayazingatia sana. Usisite kuwasiliana nami endapo dhamira yako itakusukuma kufanya hivyo. Karibu sana.

Tuendelee kuwa pamoja kupitia AMKA MTANZANIA tufike kwenye kilele cha mafanikio, pia endelea kufuatilia makala zijazo ili ujifunze zaidi.

Mwandishi wa makala hii ni mwanataaluma wa ujenzi.

Anapatikana kwa: Simu: +255 685 729 888

Baruapepe: kimbenickas@yahoo.com

 

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: